Jam 5 | BOJ | STEP | Niŋgi tamo uŋgasari ñoro koba ti unub qaji niŋgi quiye. Bunuqna gulube kokba niŋgi qa bqas. Niŋgi deqa are qalsib akamkobaoqniye.

James 5

Tamo naŋgi ñoro koba koroiyeqnub qaji naŋgi diŋo bati qa awai ugedamu oqab

1 Niŋgi tamo uŋgasari ñoro koba ti unub qaji niŋgi quiye. Bunuqna gulube kokba niŋgi qa bqas. Niŋgi deqa are qalsib akamkobaoqniye. 2 Nuŋgo ñoro ti wala ti kalil ugeeleŋej. Sisimbiŋ na nuŋgo gara kalil dego ugeugeiyej. 3 Nuŋgo gol ti silva ti di baisuwi na ugetej. Deqa mondoŋ baisuwi dena nuŋgo une boleq atsim ŋamyuo bulosim nuŋgo jejamu koitsim ugeugeiyqas. Niŋgi ñoro koba laŋa koroiyeb unu deqa diŋo batiamqa niŋgi awai uge oqab. 4 Niŋgi quiye. Nuŋgo wau tamo naŋgi nuŋgo wau miligiq dena iŋgi meli gentosib nuŋgo baŋq di ateqnab niŋgi na kamba olo naŋgi gisaŋnjroqnsib awai oto nuŋgo segi qa getentoqnsib oto segi naŋgi enjreqnub. Deqa naŋgi endegsib Qotei pailyeqnub, “O Tamo Koba Qotei, naŋgi iga kumbra uge degsib egeqnub deqa ni na kamba naŋgi awai uge enjrime.” Yeqnaqa Qotei siŋgila koba ti unu qaji a naŋgo pail di queqnu. 5 Niŋgi mandamq endia sosibqa gara bole bole jugoqnsib nuŋgo segi jejamu qa areboleboleiŋgeqnaqa iŋgi koba uyeqnub. Deqa kaja du du naŋgo jejamu diq diqeqnaq naŋgo mandor naŋgi na ñumeqnub dego kere mondoŋ Qotei na niŋgi dego luŋgwas. 6 Nuŋgo kumbra uge bei agiende. Tamo naŋgi kumbra bole bole yeqnab niŋgi na kamba naŋgi une ti qa minjroqnsib ñumeqnub. Yeqnab naŋgi na kamba olo niŋgi lawo kumbra eŋgeqnub. Naŋgi na niŋgi kumbra uge bei eŋgosaieqnub.

Niŋgi nuŋgo are miligi siŋgilatosib gulube qoboiyoqnsib Tamo Koba Yesus aqa bqajqa bati qa tariŋoqnsib soqniye

7 Deqa was qu, niŋgi nuŋgo are miligi siŋgilatosib gulube qoboiyoqnsib Tamo Koba Yesus a olo bqajqa tariŋoqniye. Niŋgi tariŋqa asgiŋgaiq. Niŋgi qalie, wau lanja naŋgi asginjrosaieqnu. Naŋgi iŋgi yagoqnsib awa qa tariŋeqnub. Awa beqnaqa iŋgi melieqnaqa naŋgi iŋgi meli di oqnsib uyeqnub. 8 Dego kere niŋgi dego nuŋgo are miligi siŋgilatosib gulube qoboiyoqniye. Tamo Koba Yesus a bqajqa bati jojomqo deqa niŋgi nuŋgo are miligi siŋgilatosib tariŋoqnsib soqniye.

9 O was qu, niŋgi Qotei aqa tamo uŋgasari naŋgi qa ŋiriŋoqnsib yomuoqnaib. Qotei na kamba nuŋgo une deqa niŋgi olo pegiŋgo uge. Niŋgi quiye. Une pegiyo tamo agi bqa jojomqo. A siraŋmeq di tigelejunu. 10 O was qu, niŋgi Qotei aqa medabu o qaji tamo naŋgi qa are qaliye. Naŋgi Tamo Koba Qotei aqa ñam na anjam palontoqneb deqa jeu tamo naŋgi na naŋgi kumbra uge enjroqneb. Ariya naŋgi Qotei aqa anjam marqa ulaosaioqneb. Naŋgi naŋgo are miligi siŋgilatoqnsib gulube di qoboiyoqneb. 11 Niŋgi quiye. Iga endegsi mareqnum, “Tamo naŋgi naŋgo are miligi siŋgilatoqnsib gulube qoboiyeqnub qaji naŋgi Qotei na taqatnjreqnu. Deqa naŋgi areboleboleinjreqnu.” Niŋgi Jop aqa kumbra qa nami queb. Jop a aqa are miligi siŋgilatosiq gulube kobaquja qoboiyesoqnej. Niŋgi qalie, bunuqna Tamo Koba Qotei na Jop olo boletej. Od, iga qalieonum, Tamo Koba Qotei a gaigai iga qa duloqnsiqa iga qa are boleiyeqnu.

Niŋgi anjam bei marqa osibqa iŋgi bei na siŋgilataib

12 O was qu, e anjam kobaquja bei unu. Anjam agiende. Niŋgi anjam bei marqa osibqa iŋgi bei na siŋgilataib. Niŋgi laŋ qure aqa ñam na anjam siŋgilataib. Niŋgi mandam aqa ñam na anjam siŋgilataib. Anjam boleamqa od qa mariye. Anjam bolesaiamqa said qa mariye. Niŋgi degyqab di Qotei na niŋgi awai uge bei eŋgwasai.

Tamo naŋgi kumbra tiŋtiŋ yeqnub qaji naŋgo pail siŋgila koba

13 Nuŋgo ambleq di tamo qudei naŋgi gulube qoboiyeqnub kio? Degamqa niŋgi na minjribqa naŋgi naŋgo gulube deqa Qotei pailyoqnebe. Nuŋgo ambleq di tamo qudei naŋgi arebole-boleinjreqnu kio? Degamqa niŋgi na minjribqa naŋgi Qotei qa louoqnsib aqa ñam soqtoqnebe. 14 Nuŋgo ambleq di tamo qudei naŋgi mainjreqnu kio? Degamqa niŋgi na minjribqa naŋgi Kristen gate naŋgi metnjrib bosib Tamo Koba Qotei aqa ñam na naŋgo gateq di baŋ atetnjrsib goreŋ bilentosib naŋgi qa pailyebe. 15 Naŋgi Tamo Koba Qotei qa naŋgo areqalo siŋgilatosib pailyqab di a na naŋgo ma kobotosim naŋgi olo tigeltnjrqas. Osim naŋgi une ti soqnib a na naŋgo une kalil dego kobotetnjrqas. 16 Deqa was qu, niŋgi nuŋgo segi segi une palontosib Kristen was qu naŋgi minjroqniye. Osib niŋgi segi segi qa pailyoqniye. Yim Qotei a na niŋgi boletŋgwas. Tamo naŋgi kumbra tiŋtiŋ yeqnub qaji naŋgo pail siŋgila koba. Deqa naŋgi pailyeqnab Qotei a quoqnsiqa naŋgi aqaryainjreqnu. 17 Niŋgi Elaija qa are qaliye. A iga bul mandam tamo. Ariya a siŋgila na endegsi pailyej, “O Qotei, ni na laŋ getentimqa awa bqasai.” A degsi pailyonaqa Qotei na laŋ getentonaqa awa bosai. Degsi sonaq sonaq wausau qalub bei oto koboej. 18 Ariya Elaija a olo pailyonaqa laŋ waqonaqa awa bej. Bosiq iŋgi iŋgi kalil melieleŋej.

Tamo bei a gam bole uratqas di was bei na gilsim aqaryaiyimqa a Qotei aqa areq olo bqas

19 O ijo was qu, nuŋgo ambleq di was bei a Qotei aqa anjam bole dauryqa uratimqa tamo bei na olo Qotei aqa anjam minjimqa a are bulyqas di tamo dena kumbra boledamu yqo. Niŋgi ijo anjam deqa geregere are qaliye. Tamo bei a une ti soqnimqa was bei na gilsim aqaryaiyimqa a gam uge di uratosim olo Qotei aqa areq bqas di was dena aqa qunuŋ moio sawaq dena oqo. Deqa tamo di a moiqasai. Qotei na aqa une gargekoba kobotetqas.